Oʻzbekistonda 2026-yilning 9 oyida oʻrtacha ish haqi — 7,27 mln soʻm

2025-yilning xuddi shu davrida ushbu koʻrsatkich 6,17 mln soʻmni tashkil etgan edi. Hisob-kitobga kichik korxonalar, mikrofirmalar va qishloq xoʻjaligi korxonalari kiritilmagan, shu sababli u barcha ishlovchilarni qamrab olmaydi. Ushbu toifalarni hisobga olgan maʼlumotlar statistiklar tomonidan yiliga bir marta eʼlon qilinadi.

Hududlar orasida yetakchilikni Toshkent saqlab qolmoqda: 12,3 mln soʻm, yillik oʻsish 18,3 foizni tashkil etdi. Undan keyin Navoiy (8,82 mln) va Toshkent (6,89 mln) viloyatlari bormoqda. Eng kam ish haqini Qashqadaryo (4,97 mln) va Surxondaryo (4,99 mln) viloyatlari xodimlari oladi. Daromadlar eng tez Namangan viloyatida (20,3 foizga), eng sekin esa Samarqand viloyatida (11,5 foizga) oʻsgan.

Sohalar boʻyicha bank, sugʻurta, lizing va kredit vositachiligi 19,71 mln soʻm bilan yetakchilik qilmoqda. Keyingi oʻrinlarda axborot va aloqa (17,01 mln) hamda tashish va saqlash (11,27 mln) turibdi. Oxirgi sohada eng yuqori oʻsish surʼati, yaʼni 19,8 foiz qayd etildi. Eng kam toʻlov sogʻliqni saqlash va ijtimoiy xizmatlar sohasida boʻlib, 4,45 mln soʻmni tashkil etadi. Taʼlimda bu koʻrsatkich 5,02 mln soʻmga teng.

Qoʻmita median maoshni tajriba tariqasida hisoblab chiqdi: yanvar–avgust oylari uchun u 4,166 mln soʻmni tashkil qildi. Ishlovchilarning yarmi ushbu summadan kam, yarmi esa koʻp oladi. Eng yuqori mediana Toshkentda (6,79 mln) va Navoiy viloyatida (6,21 mln), eng pasti Sirdaryo viloyatida (taxminan 3 mln). Sentyabr oyi maʼlumotlari toʻliq shakllanmagan, shu sababli qoʻmitaning tushuntirishicha, medianani toʻqqiz oylik oʻrtacha ish haqi bilan toʻgʻridan-toʻgʻri taqqoslash mumkin emas.