Mirziyoyevga Baliqchida baliqchilik va limon issiqxonalari loyihalari taqdim etildi

Rejalar Andijon viloyatining Baliqchi tumani misolida koʻrib chiqildi. U yerda 24 ta meliorativ quduq yonida toʻliq siklli baliqchilik majmualarini joylashtirish rejalashtirilmoqda: chavoqlar va ozuqa yetkazib berishdan tortib qayta ishlash, saqlash va sotishgacha. Har bir loyiha 50 sotixli maydonga moʻljallangan; har biridan yiliga kamida 30 tonna gulmoyi (forel) olish koʻzda tutilgan, har birida 10 tadan ish oʻrni yaratiladi. Loyihalarni yagona baliqchilik xoldingi orqali boshqarish taklif etildi.

Soha oldida intensiv texnologiyalar hisobiga baliq yetishtirish hajmini yiliga 1 million tonnaga yetkazish vazifasi turibdi. Tuman tajribasini boshqa hududlarga ham tatbiq etish maqsadida 2027-yil 1-martga qadar butun mamlakat boʻylab 4 mingdan ortiq meliorativ quduqni xatlovdan oʻtkazish topshirildi. Baliqchilik uchun yaroqli quduqlarni davlat-xususiy sheriklik shartlari asosida tadbirkorlarga boshqaruvga berish rejalashtirilmoqda. Shuningdek, Xonobodda sovuq suv baliqlarini yetishtirish hamda Ulugʻnorda suv havzalarida baliqchilikni yoʻlga qoʻyish boʻyicha loyihalar taqdim etildi.

Shu tumanning oʻzida toʻqqizta mahalla yaqinida 100 gektar energiya tejamkor limon issiqxonalari qurish va ularni tadbirkorlarga tayyor holda topshirish, yetishtirish, saralash, qayta ishlash, qadoqlash, saqlash va sotishni esa yagona kooperatsiya zanjiriga birlashtirish niyat qilingan. Dastlabki hisob-kitoblarga koʻra, 500 ta issiqxona kamida 1 ming nafar mahalliy aholini ish bilan taʼminlaydi; loyihaga ishsizlar va kam taʼminlangan oilalarni jalb etish rejalashtirilmoqda. Kelgusi yilda hududlarda yana 200 gektar maydonda shunday majmualar barpo etish rejalashtirilgan boʻlib, bu 2 mingta oilaning daromadini oshirishi kutilmoqda.

Taqdimot yakunlari boʻyicha Mirziyoyev kambagʻallikni qisqartirishga qaratilgan ushbu taqdim etilgan loyihalarni moliyaviy qoʻllab-quvvatlash hamda aholini baliqchilik va limonchilikka oʻqitish xarajatlarini kompensatsiya qilish choralarini koʻrishni topshirdi.