Hokim yordamchilariga biznesni roʻyxatga olish soʻrovnomasi uchun 8160 soʻmgacha toʻlanadi

Toʻlov miqdori subyektning maqomiga bogʻliq. Rasmiy roʻyxatdan oʻtgan subyekt boʻyicha qabul qilingan soʻrovnoma uchun roʻyxatga oluvchi 6 120 soʻm, davlat roʻyxatidan oʻtmasdan faoliyat yuritayotgan subyekt boʻyicha esa 8 160 soʻm oladi. Stavkalar 2026-yil 1-sentabrdan amal qilayotgan 1,36 mln soʻmlik mehnatga haq toʻlashning eng kam miqdoridan (MHTEKM) hisoblangan boʻlib, uning 0,45% va 0,6% ini tashkil etadi. Mazkur mexanizm Vazirlar Mahkamasining 2026-yil 9-oktabrdagi 557-son qarori bilan mustahkamlangan.

Pullar faqat xodimga biriktirilgan hududdagi barcha iqtisodiy birliklar qamrab olinganda hamda soʻrovnomalar toʻliq toʻldirilib, qabul qilingandagina oʻtkaziladi. Toʻlovlarni Milliy statistika qoʻmitasi Jahon banki ishtirokidagi loyiha mablagʻlari hisobidan amalga oshiradi. Adliya vazirligi misol keltirdi: 400 ta rasmiy va 100 ta norasmiy birlik toʻliq roʻyxatga olinganda toʻlov 3 264 000 soʻmni tashkil etadi. Oʻzini oʻzi band qilganlar uchun haq toʻlanmaydi: ular roʻyxatdan onlayn tarzda oʻzlari oʻtadilar.

Mehnat vazirligi maʼlumotlariga koʻra, hokim yordamchilarining asosiy lavozimi va oylik ish haqi saqlanib qoladi. Agar roʻyxatga oluvchi kutilmagan sabablarga koʻra almashtirilsa, toʻlovni olish huquqiga ishni amalda bajargan shaxs ega boʻladi.

Roʻyxatga olish 2026-yil 15-oktabrdan 30-noyabrgacha davom etadi, maʼlumotlar 1-oktabr holatiga koʻra hisobga olinadi. U kompaniyalar, YaTTlar, oʻzini oʻzi band qilganlar, xorijiy vakolatxonalar va roʻyxatdan oʻtmagan subyektlarni qamrab oladi. Natijalarni Milliy statistika qoʻmitasi 2027-yil 1-sentabrdan kechiktirmay eʼlon qiladi, deb yozadi Podrobno.uz.