Oʻzbekistondagi logistika markazlari 2040-yilgacha ikki soliqdan ozod qilinadi

Soliq imtiyozini qoʻllash uchun majmua BMTning EIKATO (ESKATO) quruqlik portlari toʻgʻrisidagi bitimiga kirishi, terminallar va omborlarni boshqarishning raqamli tizimlarini joriy etishi hamda Transport vazirligining E-logistika tizimida kamida "BB" reytingiga ega boʻlishi kerak.

2029-yil 1-avgustgacha reyestrga kiritilgan markazlar respublikada ishlab chiqarilmaydigan ombor uskunalari, yuk ortish-tushirish texnikalari, agregatlar va ehtiyot qismlarni bojsiz va majburiy sertifikatsiyasiz olib kirishlari mumkin boʻladi. Bundan tashqari, 2027-yil 31-dekabrgacha avtobus va yuk mashinalari (M2, M3 va N toifalari) ishlab chiqaruvchilari xorijiy butlovchi qismlarni olib kirishda bojxona bojlaridan ozod qilinadi, 2026-yil 1-noyabrdan esa xalqaro kuryerlik joʻnatmalarini rasmiylashtirish yigʻimi 20 foizga kamaytiriladi.

Qaror bilan 2030-yilgacha boʻlgan maqsadli koʻrsatkichlar tasdiqlandi: xalqaro talablarga javob beradigan quruqlik portlari tarmogʻini 24 tadan 30 taga yetkazish, sohaviy xizmatlar eksportini 3,5 milliard dollarga, tranzit tashuvlarni esa 18,5 million tonnaga yetkazish. Logistika ixtisoslashuvi markazlari sifatida Xonobod, Olot, Termiz, Yangiyoʻl va Ohangaron tumanlari belgilandi.