Oʻzbekistonda suyultirilgan gaz narxini 5000 soʻmgacha oshirish taklif qilindi

Hujjatga muvofiq, maishiy suyultirilgan gaz tarifini QQS bilan birga bir kilogramm uchun 2000 soʻmdan 5000 soʻmgacha oshirish taklif etilmoqda. Uni aholiga yetkazib berish xizmatining eng yuqori qiymatini bir kilogramm uchun 1300 soʻm miqdorida cheklash rejalashtirilmoqda. Yetkazib berish bilan tadbirkorlar va “Hududgaztaʼminot”ning shoʻba korxonasi — LPG-Trade kompaniyasi shugʻullanadi.

Shu bilan birga, 2030-yil 1-yanvarga qadar kam taʼminlangan fuqarolar uchun xarajatlarni kompensatsiya qilish joriy etilishi taklif qilinmoqda. Toʻlov miqdori har bir kilogramm uchun 3000 soʻmni, biroq oyiga koʻpi bilan 20 kilogrammni (60 ming soʻmgacha) tashkil etadi. Yordam puli Ijtimoiy reyestrdagi oilalar, jon boshiga daromadi ikki minimal isteʼmol xarajatlaridan (1,43 mln soʻm) koʻp boʻlmagan oilalar, shuningdek, yetim bolalari boʻlgan oilalar uchun koʻzda tutilgan.

Subsidiya olish uchun arizani Davlat xizmatlari markazlari, “Inson” markazlari, mahalla ijtimoiy xodimlari, my.gov.uz portali yoki “Ijtimoiy karta” xizmati orqali topshirish mumkin boʻladi. Mablagʻlar xarid fakti E-gaz Billing tizimi orqali tekshirilgandan soʻng ijtimoiy kartalarga oʻtkazila boshlaydi. Hukumat hisob-kitoblariga koʻra, ushbu chora Ijtimoiy reyestrdagi 220 mingga yaqin abonentni qamrab oladi va buning uchun 158 mlrd soʻm talab etiladi.

Loyiha materiallarida mualliflar tarifning qayta koʻrib chiqilishini avvalgi narxning zararliligi, yetkazib berishdagi taqchillik va balans tuzilmasining oʻzgarishi bilan izohlamoqda: yoqilgʻining oʻzimizda ishlab chiqarilishi kamaymoqda, qimmatroq import hajmi esa oshmoqda.