Yangi Toshkentda investorlar uchun infratuzilma toʻlovlari kamaytiriladi

Eʼlon qilingan qarorlarga koʻra, toʻlovlarning bazaviy stavkalari savdo, xizmat koʻrsatish va biznes markazlari uchun 3 baravarga, mehmonxonalar va turizm obyektlari uchun 5 baravarga, madaniyat va koʻngilochar maskanlar uchun esa 10 baravarga kamaytiriladi. Nodavlat bolalar bogʻchalari, maktablar va shifoxonalar uchun toʻlov 1% darajasida belgilanadi. Yangi parametrlar qurilishi allaqachon boshlangan loyihalarga ham taalluqli boʻladi.

Yirik investitsiyalarni jalb qilish maqsadida yer uchastkalarini ochiq tashabbuslar mexanizmi va Swiss Challenge («shveysarcha chaqiruv») tamoyili asosida taqdim etish yoʻlga qoʻyiladi. Ushbu sxemaga muvofiq, investorning arizasi ochiq eʼlon qilinadi va agar yanada qulayroq shartlarga ega muqobil takliflar tushmasa, yer maydoni arizachiga beriladi. Keltirilgan maʼlumotlarga koʻra, realizatsiya qilingan 54 ta lotdan faqat uchtasida qiymati 100 mln dollardan ortiq boʻlgan obyektlar rejalashtirilgan.

Bundan tashqari, yetakchi jahon meʼmorlarining noyob obyektlari uchun kelishish, loyihalashtirish, qurish va foydalanishga topshirishning tezlashtirilgan tartiblari oʻrnatiladi. Prezident, shuningdek, ruxsatnomalar berishda bir xil maʼlumotlarni qayta soʻrash amaliyotiga chek qoʻyishni buyurdi.