Oʻzbekistonda 2026-yil boshidan buyon beshta yangi gaz koni ochildi

Taqdim etilgan maʼlumotlarga koʻra, toʻrtinchi chorakda yana 40 ta quduq qazish rejalashtirilgan; allaqachon qazilgan 80 ta quduq orasida chuqurligi 6 ming metr va undan ortiq boʻlganlari ham bor. 2026-yilda uch oʻlchamli seysmik qidiruv hajmini 2025-yilga nisbatan besh barobarga oshirish koʻzda tutilgan. Xorijiy hamkorlar bilan birgalikda Ustyurtning chuqur qatlamlarini oʻrganish, burgʻilash va geofizik maʼlumotlarni tahlil qilish boʻyicha loyihalar olib borilmoqda.

Gaz uzatish tizimida magistral gaz quvurlarini qurish va kompressor stansiyalarini modernizatsiya qilish rejalashtirilgan. Ayrim obyektlarda zamonaviy elektr dvigatellarining joriy etilishi har yili 125 million kub metrgacha tabiiy gazni iqtisod qilishni taʼminlashga qaratilgan. Toʻqqiz oy yakunlariga koʻra, «Oʻzbekneftgaz» AJ va tizim korxonalarining jami sof foydasi oʻtgan yilning shu davriga nisbatan oshdi, kredit portfelini maqbullashtirish esa umumiy qarz va qarz xizmati xarajatlarini kamaytirishga yordam berdi.

«Mustaqillikning 25 yilligi» konida avariya oqibatlarini bartaraf etish bilan Xitoyning ixtisoslashgan kompaniyasi shugʻullanmoqda; ayni paytda obyektga texnika keltirilmoqda va burgʻilash uchun maydonchalar tayyorlanmoqda. Shuningdek, Fargʻona neftni qayta ishlash zavodidagi vaziyat haqida ham hisobot berildi: qurilmalar taʼmirlangach, dizel yoqilgʻisi ishlab chiqarish 30 foizga, bitum 60 foizga, aviakerosin esa besh barobarga oshdi, quvvatlardan foydalanish darajasini esa yil oxirigacha 40 foizdan 65 foizga koʻtarish kutilmoqda.