Oʻzbekiston Togʻ-kon sanoati va geologiya vazirligi Turkiya va Ummon kompaniyalari bilan muzokaralar oʻtkazdi

Oʻzbekiston Respublikasi Togʻ-kon sanoati va geologiya vaziri Bobur Islamov Turkiyaning Nakkaş Holding kompaniyasi bosh direktori Mehmet Ali Islamogʻlu boshchiligidagi delegatsiya bilan uchrashdi. Vazirlik matbuot xizmati xabariga koʻra, tomonlar xoldingning istiqbolli maydonlarni oʻzlashtirish, yangi quvvatlarni yaratish, xomashyo bazasini kengaytirish hamda texnogen va chiqindi uyumlarini qayta ishlash loyihalaridagi ishtiroki imkoniyatlarini koʻrib chiqdilar.

Shu bilan birga, vazir oʻrinbosari Rustam Yusupov boshchiligidagi idora delegatsiyasi Ummonda ishbilarmonlik uchrashuvlari oʻtkazdi. Ummonning Minerals Development Oman kompaniyasi bilan geologiya-qidiruv ishlarini tashkil etish va qimmatbaho minerallar konlarini oʻzlashtirish masalalari, Tasnim Group vakillari bilan esa geologiya-qidiruv hamda muhim (kritik) minerallar sohasidagi qoʻshma loyihalar muhokama qilindi.

Ummon Sultonligiga tashrif doirasida Oʻzbekiston delegatsiyasi, shuningdek, Ummon Savdo-sanoat palatasi, Iqtisodiyot vazirligi, Savdo, sanoat va investitsiyalarni ragʻbatlantirish vazirligi, Maxsus va erkin iqtisodiy zonalar davlat boshqarmasi, shuningdek, Nine Business Company LLC, Oman Trade Establishment, OQ, Al Zubair Corporation LLC va Asyad Group kompaniyalari vakillari bilan ham uchrashdi.