Oʻzbekiston Minskdagi koʻrgazmada sanoat salohiyatini taqdim etdi

Xalqaro koʻrgazma 30-sentabrdan 2-oktabrgacha BelExpo koʻrgazma markazida boʻlib oʻtmoqda. Unda Yevroosiyo iqtisodiy komissiyasi, shuningdek, oltita davlat: Oʻzbekiston, Ozarbayjon, Eron, Kambodja, Qirgʻiziston va Qozogʻiston oʻzlarining alohida stendlarini tashkil etdi.

Abdulla Aripovning soʻzlariga koʻra, toʻliq ishlab chiqarish zanjirlarini yaratish orqali sanoat kooperatsiyasi, elektronika va elektrotexnika tarmoqlari, sunʼiy intellekt va raqamli iqtisodiyot sohasi, shuningdek, oziq-ovqat sektori sheriklikning ustuvor yoʻnalishlari hisoblanadi. Hukumat rahbari Oʻzbekiston korxonalarining ham Belarus, ham boshqa xorijiy hamkorlar bilan birgalikda innovatsion loyihalarni amalga oshirishga tayyorligini qayd etdi.

Bosh vazir soʻnggi yillarda Oʻzbekistonda elektrotexnika mahsulotlari ishlab chiqarish toʻqqiz barobardan koʻproqqa oshganini, eksport esa 65 ta davlatni qamrab olgan holda 1 milliard dollardan oshganini maʼlum qildi. Respublikada 2030-yilga borib elektrotexnika va elektronika tarmoqlarida ishlab chiqarish hajmini 11 milliard dollargacha yetkazish, xorijga yetkazib berish hajmini 5 milliard dollargacha oshirish hamda mazkur sohaga 3 milliard dollardan ortiq investitsiyalarni jalb qilish rejalashtirilgan.