Toshkentda vazirlik va idoralarning yettita binosi sotildi

Agentlik maʼlumotlariga koʻra, Transport vazirligi, Sport vazirligi, Qurilish va uy-joy kommunal xoʻjaligi vazirligi, Davlat xizmatlari agentligi, Avtomobil yoʻllari qoʻmitasi, Ipakchilik va jun sanoatini rivojlantirish qoʻmitasi hamda Turizm qoʻmitasi huzuridagi “Sayyohlarga xizmat koʻrsatish markazi” DUK binolari sotilgan.

Yana 11 ta obyekt boshlangʻich qiymati qariyb 1,1 trln soʻm (1095,8 mlrd soʻm) bilan ochiq savdolarga chiqarilgan, 20 ta obyekt boʻyicha esa sotuvoldi tayyorgarlik ishlari olib borilmoqda. Xususan, Davlat aktivlarini boshqarish agentligi, Kambagʻallikni qisqartirish va bandlik vazirligi, Texnik jihatdan tartibga solish agentligi, Suv xoʻjaligi vazirligi va ularning tizimidagi tuzilmalar binolari boʻyicha auksionlar davom etmoqda.

Koʻchmas mulk savdosi Vazirlar Mahkamasining 2025-yil 7-martdagi 146-sonli qarori doirasida amalga oshirilmoqda, mazkur qaror 150 ta davlat organi va davlat ishtirokidagi tashkilotlarning Yangi Toshkentga koʻchirilishini nazarda tutadi. Hujjat bilan poytaxtdagi jami 83 ta obyektni ochiq savdolarda sotish yoki ijaraga berish rejalashtirilgan. Tushgan mablagʻlar Yangi Toshkentda maʼmuriy infratuzilmani yaratishga yoʻnaltiriladi.