Oʻzbekistonda taqiqlangan internet-materiallar roʻyxati 2057 tagacha koʻpaydi

Roʻyxatdagi bandlarning eng koʻpi Telegramʼga tegishli: 967 ta kanal va guruh. Undan keyin Instagram (454), Facebook (276) va YouTube (214) joy olgan. Shuningdek, roʻyxatga TikTokʼdagi 68 ta akkaunt, «Odnoklassniki»dagi 44 ta sahifa va Threadsʼdagi bitta profil kiritilgan. Alohida tarzda 13 ta sayt va ilova hamda 20 ta boshqa materiallar sanab oʻtilgan boʻlib, ular orasida kitoblar, audio va videoyozuvlar mavjud.

Podrobno.uz hisob-kitoblariga koʻra, roʻyxatning 13-iyuldagi tahririda 1915 ta band bor edi, yaʼni yozdan buyon ularning soni 142 taga koʻpaygan.

Roʻyxatga kiritilgan materiallarni Oʻzbekistonga olib kirish, tayyorlash, tarqatish va mamlakat hududida namoyish etish taqiqlanadi. Uznews roʻyxatda koʻrsatilgan kanallar va guruhlarning materiallarini tarqatganlik uchun javobgarlik nazarda tutilganini taʼkidlaydi.

Kursiv Uzbekistanʼning xabar berishicha, Oliy sud fuqarolar, ota-onalar va yoshlarga murojaat qilib, taqiqlangan resurslardan uzoq yurishga hamda diniy aqidaparastlik, ekstremizm va terrorizm gʻoyalari taʼsiriga tushmaslikka chaqirdi.