San-Paulu aeroportida 470 ming dollarlik RTX 5090 videokartalari partiyasi yoʻqoldi

Yuz bergan hodisa haqida kompaniya rahbari Odersu Matos ijtimoiy tarmoqlarda maʼlum qildi. Uning soʻzlariga koʻra, distribyutor 38 yillik faoliyati davomida ilk bor import qilingan yukning yoʻqolishiga duch kelgan. Koʻrsatilgan 2,5 million Braziliya reali (iXBT.com baholashiga koʻra — taxminan 500 ming dollar, 3DNews va Habr maʼlumotlariga koʻra — taxminan 470 ming dollar) miqdori partiyaning xarid narxi hisoblanadi, videokartalarning aniq sonini esa kompaniya oshkor qilmayapti.

3DNews havola qilgan Braziliyaning UOL nashri maʼlumotlariga koʻra, partiya aeroportga 20-sentabr kuni yetib kelgan. Bojxona tranzit deklaratsiyasi 24-sentabrda roʻyxatga olingan va ertasi kuni tasdiqlangan, biroq distribyutor uskunani olib keta olmagan. 6-oktabr kuni aeroport vakillari tagliklarning taxminiy joyini aytishgan, 14-oktabrda esa yukni topishning imkoni boʻlmaganini tan olishgan.

Aeroport operatori GRU Airport hodisa haqida vakolatli organlarni xabardor qilganini va zararni qoplash jarayonini boshlash uchun importyorga koʻrsatmalar yuborganini bildirdi. Maʼmuriyat partiyaning yoʻqolish sabablari hozircha aniqlanmaganini va oʻgʻirlik yuz bergani haqida tasdiqlar yoʻqligini taʼkidladi.