Toshkentda TsUM yonidagi restoran qurilmasi mojarodan soʻng demontaj qilindi

Poytaxt hokimligi tekshiruvi hududdan foydalanish talablari, jumladan, piyodalar uchun erkin harakatlanishni taʼminlash boʻyicha qoidabuzarliklarni aniqladi. Maʼmuriyat hudud qonunchilikka muvofiq holatga keltirilganini maʼlum qildi hamda stollarning olib tashlanishi va konstruksiyalarning buzilishi aks etgan kadrlarni eʼlon qildi.

Surishtiruvga 17-oktabr kuni soat 13:00 atrofida yuz bergan hodisa sabab boʻldi. Ijtimoiy tarmoqlarda tarqalgan videoyozuvda muassasaning 36 yoshli vakili stollar joylashgan hudud orqali oʻtgani sababli voyaga yetmagan kuryerni haqorat qilgani va tahdidlar bildirgani aks etgan. Toshkent shahar IIBB erkak jamoat tartibini buzganini maʼlum qildi. Unga nisbatan Maʼmuriy javobgarlik toʻgʻrisidagi kodeksning 183-moddasi (mayda bezorilik) boʻyicha bayonnoma rasmiylashtirilib, materiallar jinoyat ishlari boʻyicha tuman sudiga yuborildi.

Brasserie Park vakillari hodisa holatlariga oydinlik kiritilayotgani va videokuzatuv kameralari yozuvlari oʻrganilayotganini maʼlum qilib, xodimlar tomonidan tahdid qilinishiga yoʻl qoʻyib boʻlmasligini taʼkidladi. Restorandagilar terrasa boʻylab oʻtish joyi piyodalar uchun ochiqligini, biroq piyodalar yoʻlakchasida moped va mototsikllarda harakatlanmaslikni soʻrashlarini qoʻshimcha qilishdi.