Bekobodda korxonaga havoni ifloslantirgani uchun 1,63 mlrd soʻm kompensatsiya hisoblandi

Laboratoriya tahlillari natijalariga koʻra, elektrda poʻlat eritish sexida tashlanmalardagi oltingugurt dioksidi konsentratsiyasi meʼyordan 1533 baravarga, uglerod oksidi — 20 baravarga, noorganik chang — 2,4 baravarga oshgan. Ferroqotishmalar ishlab chiqariladigan sexda esa noorganik chang boʻyicha meʼyor 24,9 baravarga, uglerod oksidi boʻyicha — 23,3 baravarga, azot dioksidi boʻyicha — 2,12 baravarga oshib ketgan.

Tekshiruvchilar, shuningdek, poʻlat eritish sexidagi chang-gaz tozalash uskunasi samarasiz ishlagani, shu sababli ifloslantiruvchi moddalarning bir qismi toʻgʻridan-toʻgʻri atmosferaga chiqqanini aniqladi. Bundan tashqari, korxona ekologik xulosa talablarini toʻliq bajarmagan, ifloslantiruvchi manbalarning bir qismida avtomatlashtirilgan monitoring tizimlari oʻrnatilmagan, laboratoriya nazorati esa yetarli boʻlmagan.

Atrof-muhitni ifloslantirgani uchun korxonaga 1 mlrd 630 mln 920 ming 419 soʻm miqdorida kompensatsiya toʻlovi hisoblandi. Rahbariyatga tozalash uskunalarining filtrlarini toʻliq almashtirish, uning samaradorligini kamida 95% darajasida taʼminlash, laboratoriya nazoratini kuchaytirish hamda asosiy ifloslantiruvchi manbalarga avtomatik monitoring stansiyalarini oʻrnatish boʻyicha majburiy koʻrsatmalar berildi. Ekopolitsiyada atmosfera havosi sifatini yaxshilash boʻyicha ishlar davom etayotgani maʼlum qilindi.