Toshkentda hovlilarda, maktab va bogʻchalar yonida mikrooʻrmonlar tashkil etish topshirildi

Mikrooʻrmonlar uchun 200 dan 1000 kv. m gacha boʻlgan maydonlar ajratiladi. Ularda ekish zich va koʻp pogʻonali boʻlishi kerak: bir kvadrat metrga kamida ikkita daraxt va buta koʻchati toʻgʻri keladi. Agar yer ajratishning imkoni boʻlmasa yoki u asfalt yoxud beton bilan qoplangan boʻlsa, hujjatda katta konteynerlarda kichik jamoat bogʻlarini tashkil qilish koʻzda tutilgan. Konteynerlarni tuman hokimliklari va homiylar taʼminlaydi, koʻchatlarni Oʻrmon xoʻjaligi agentligi yetkazib beradi, ekish va parvarishlashni esa mahallalar aholi bilan birgalikda tashkil etadi.

Yashil bogʻlar uchun ajratilgan yer uchastkalaridan, qarorga muvofiq, faqat belgilangan maqsadda foydalanish mumkin. Ularni fuqarolar va tashkilotlar mulkiga oʻtkazish, qurilish qilish, ularga inshootlar joylashtirish yoki aholi uchun yopib qoʻyish taqiqlanadi. 2027-yil 1-yanvardan boshlab «Yashil lot» tizimi yoʻlga qoʻyilishi koʻzda tutilgan: fuqarolar va kompaniyalarga yashil bogʻlar uchun shartnoma asosida yer ajratiladi.

Tuman «yashil dasturlari»ni 2026-yil 1-noyabrgacha, 2027-yildan boshlab esa har yili 1-martgacha tayyorlash topshirildi. Ularni xalq deputatlari tuman Kengashlari tasdiqlaydi. Ekish mavsumi boshlangunga qadar shahar xizmatlari yer uchastkalarini tayyorlashi va sugʻorish tizimlarini yoʻlga qoʻyishi lozim. 2028-yil yanvariga kelib «Yashil makon» platformasida daraxtlarni geolokatsiyasi, turi, yoshi va holatini koʻrsatgan holda hisobga olish uchun «Daraxtlar balansi» modulini joriy etish rejalashtirilgan.