Oʻzbekistonda 11–12-oktabr kunlari baʼzi joylarda yomgʻir yogʻadi, 11-oktabrda shamol kuchayadi

Yakshanba, 11-oktabr kuni respublika boʻylab, Toshkent viloyati va Fargʻona vodiysidan tashqari, baʼzi joylarda yomgʻir yogʻadi. Shamol tezligi 7–12 m/s, Samarqand, Qashqadaryo va Surxondaryo viloyatlarining ayrim tumanlarida chang-toʻzonlar bilan 15–20 m/s gacha yetadi. Kunduzi +22…+27°, janubda +32° gacha boʻladi. Togʻlarda baʼzi joylarda yomgʻir yogʻadi, sel-suv toshqinlari yuzaga kelishi mumkin.

Toshkentda 11-oktabr kuni yogʻingarchilik kutilmaydi, kunduzi +25…+27° boʻladi. Shamol 3–8 m/s tezlikda esib, 10–12 m/s gacha kuchayishi mumkin, shaharning ayrim tumanlarida chang-toʻzon kuzatilishi mumkin.

Dushanba, 12-oktabr kuni sinoptiklar Qoraqalpogʻiston va Xorazm viloyatidan tashqari barcha hududlarda baʼzi joylarda yomgʻir yogʻishini prognoz qilmoqda. Toshkent, Samarqand, Jizzax va Sirdaryo viloyatlarida kunduzi +18…+23°, shamol 7–12 m/s boʻladi. Togʻlarda vaqti-vaqti bilan yomgʻir yogʻadi, baʼzi joylarda kuchli boʻladi, baland togʻlarda qor yogʻishi mumkin.