Toshkentda kasallangan va xavfli daraxtlar reyestri tuziladi

Hujjat 7-oktabr kuni qabul qilingan. Qarorga koʻra, xatlov zararkunandalar va kasalliklar bilan zararlangan, qurigan, tabiiy omillar tufayli shikastlangan yoki fuqarolar salomatligi hamda mol-mulkiga xavf tugʻdirayotgan daraxt va butalarni qamrab oladi. Tekshiruvlar natijasida dov-daraxtlarning soni, turlari, yoshi, holati va koordinatalari toʻgʻrisidagi maʼlumotlarni oʻz ichiga olgan yagona reyestr shakllantiriladi.

Jarayonni muvofiqlashtirish poytaxt hokimining birinchi oʻrinbosari Baxtiyor Rahmonov boshchiligidagi ishchi guruhga topshirildi. Mutaxassislar joylarga chiqib koʻrikdan oʻtkazadi, axborotni tizimlashtiradi va bazaga kiritadi. Avariya holatida yoki qurigan deb topilgan dov-daraxtlarni faqat hududlar balansiga masʼul boʻlganlar ariza topshirib, rasmiy ruxsatnoma olgandan keyingina kesish mumkin boʻladi.

Maʼlumotlarning ishonchliligi uchun tegishli boshqarma va korxonalar rahbarlari shaxsan javobgardir. Toshkent shahar Ekologiya boshqarmasi maʼlumotlarni tekshirish uchun joylarda tanlab nazorat olib boradi va har chorakda hokimlikka hisobot berib turadi. Poytaxt maʼmuriyati matbuot xizmatining Gazeta.uz nashriga tushuntirishicha, daraxtni butunlay kesib tashlash har doim ham talab etilmaydi: ayrim hollarda kuchli shamolda qulab tushish xavfi boʻlgan quruq shoxlarni kesishning oʻzi kifoya qiladi.