Toshkentda hafta oxirigacha havo sifati yomonlashishi prognoz qilindi

Idora maʼlumotlariga koʻra, 6-oktyabr soat 17:00 dan 7-oktyabr soat 10:00 gacha mayda dispersli PM2,5 zarrachalarining oʻrtacha konsentratsiyasi 43,5 mkg/m³, PM10 esa 97,2 mkg/m³ ni tashkil etdi. AQI xalqaro indeksining oʻrtacha koʻrsatkichi 117 ga yetdi («sezgir guruhlar uchun zararli»). Milliy shkala boʻyicha PM2,5 «yashil» darajada, PM10 esa «sariq» darajada boʻlib, 7-oktyabr soat 10:00 ga kelib «toʻq sariq» darajaga koʻtarildi.

Ekologlar koʻrsatkichlar oʻzgarishining asosiy sababi sifatida noqulay meteorologik sharoitlarni: shamol tezligi 1 m/s atrofida boʻlganini va kuchli tungi harorat inversiyasini koʻrsatdilar. 6-oktyabr soat 23:00 dan 7-oktyabr soat 08:00 gacha inversiya qatlamidagi harorat farqi 1,8 dan 6,7 darajagacha boʻldi. Sovuq yer ustida hosil boʻlgan iliq havo qatlami zararli moddalarning vertikal aralashishi va tarqalishiga toʻsqinlik qildi.

Bunday ob-havo omillari hafta oxiriga qadar tunda va ertalab atmosfera sifatining qisqa muddatli pasayishiga olib kelishi mumkin. Havo holati monitoringini Maxsus komissiya davom ettirmoqda.