Toshkentda qisqa muddatli chang boʻronlari boʻlishi mumkinligidan ogohlantirildi

Mutaxassislar prognozlariga koʻra, shaharda shamol tezligi 3–8 m/s ni tashkil etadi, ayrim joylarda esa shamol tezligi 10–14 m/s gacha yetishi mumkin. Shamolning kuchayishi havoga changning vaqtincha koʻtarilishiga hamda atmosferada, birinchi navbatda, PM10 chang zarralari konsentratsiyasining oshishiga olib kelishi mumkin.

Oʻzgidrometda ham kun davomida mamlakatning ayrim hududlarida shamol tezligi 13–18 m/s gacha kuchayishi maʼlum qilindi. Qoraqalpogʻiston, Buxoro, Navoiy, Jizzax, Surxondaryo va Fargʻona viloyatlarining qator tumanlarida shamol tezligi chang-toʻzon bilan 20–22 m/s ga yetishi mumkin.

Ekologiya milliy qoʻmitasi, shuningdek, 2–3-oktyabr kunlari Toshkentda harorat inversiyasi va shamolning kuchsizligi qayd etilganini, bu esa ifloslantiruvchi moddalarning tarqalishini sekinlashtirganini taʼkidladi. Green University hududidan 2-oktyabr tushdan 3-oktyabr tushgacha boʻlgan davr uchun olingan namunalarning tahliliga koʻra, mineral va tuproq changi PM2.5 zarralarida 67% ni, PM10 zarralarida esa 80% ni tashkil etgan.