Chorvoqdagi Sea Breeze kurorti loyihasi ekoekspertizaning ikkinchi bosqichidan oʻtdi

Ijobiy xulosa 2026-yil 10-sentabrda berilgan boʻlib, uning amal qilish muddati 2029-yil 10-sentabrgacha etib belgilangan. Ekologiya va iqlim oʻzgarishi milliy qoʻmitasi matbuot xizmati ekologik baholash bosqichma-bosqich oʻtkazilishini maʼlum qildi: birinchi va ikkinchi bosqichlardan soʻng obyekt foydalanishga topshirilishidan oldin yakuniy bosqich — ekologik oqibatlar toʻgʻrisidagi bayonotni tayyorlash jarayoni kutilmoqda. Idora Jamoatchilik kengashining joylarga chiqishlari davomida qurilish maydonchasida belgilangan talablarning buzilishi aniqlanmaganini qayd etdi.

Kurort markazining birinchi navbati 4R10 trassasidan pastda, Boladala va Kalashsoy vodiysi oraligʻidagi 180 gektar maydonni qamrab oladi. Qurilish uchun 24,1 gektar (birinchi navbatdagi uchastkaning 13,4 foizi) ajratilgan, koʻkalamzorlashtirish esa maydonning 60,6 foizini (79,2 gektar manzarali daraxtzorlar, tabiiy hududlar va yongʻoq-mevali oʻrmonlar) tashkil etadi. Chorvoq suv omborining eni 100 metr va uzunligi 4,8 km boʻlgan suvni muhofaza qilish zonasi polosasi qurilishdan xoli boʻlib qoladi, shu bilan birga uning hududida joylashgan ikkita dala hovli uchastkasidagi toʻrtta bino buzilishi kerak.

Ekspertiza xulosasi majburiy shartlar majmuini oʻz ichiga oladi. Quruvchiga qimmatbaho koʻchatlarni, jumladan yongʻoq, Sivers olmasi va Zarafshon archasini saqlab qolish yoki boshqa joyga koʻchirib oʻtkazish, yoxud olib tashlanadigan har bir daraxt oʻrniga oʻnta daraxt ekish majburiyati yuklatilgan. Oqova suvlarni chiqarib yuborish uchun Boqachul kanalizatsiya kollektorini Chorvoq akvatoriyasi orqali sharqiy qirgʻoqqa (1420 metr) uzaytirish va oqovalarni Chirchiq tozalash inshootlariga yoʻnaltirish koʻzda tutilgan — ushbu oʻtish qismi alohida davlat ekologik ekspertizasidan oʻtishni talab qiladi.