Mirziyoyev Qarshidagi Nasaf traktorlarini yigʻish zavodiga tashrif buyurdi

Zavod Xitoyning 500 ta eng yirik xususiy kompaniyalari roʻyxatiga kiritilgan Jiangsu World Group korporatsiyasi tarkibiga kiradi. Qiymati 20 million dollar boʻlgan loyiha toʻliq xorijiy investorlar tomonidan moliyalashtirildi. Maydoni 5 gektarni egallaydi, ishlab chiqarish korpuslari uchun 12 ming kvadrat metr ajratilgan. Korxonada 200 ta ish oʻrni yaratilgan, jarayonlarning bir qismi avtomatlashtirilgan.

Zavod assortimenti — beshta modeldagi traktorlar, shuningdek, paxta terish mashinalari va boshqa texnikalardan iborat. Traktorlar GPS-navigatsiya va avtopilot bilan taʼminlangan, oʻgʻitlar masofadan turib kiritiladi va nazorat qilinadi. Traktorlarni yigʻish 30 foizga mahalliylashtirilgan: zavodning oʻzida 138 turdagi detallar va butlovchi qismlar tayyorlanadi. Tashrif chogʻida butlovchi qismlarni oʻzimizda ishlab chiqarish va mahalliy korxonalar bilan kooperatsiya orqali mahalliylashtirish ulushini bosqichma-bosqich oshirish zarurligi taʼkidlandi.

Zavod shuningdek, mashinalarga dalada texnik xizmat koʻrsatish, nosozliklarni erta aniqlash va xavfsiz ekspluatatsiya qilish boʻyicha oʻqitishni ham amalga oshiradi. Rejalarda — mahsulotning 30 foizini qoʻshni mamlakatlarga joʻnatish va yillik eksportni 50 million dollarga yetkazish koʻzda tutilgan.

Mirziyoyevning soʻzlariga koʻra, shu paytgacha qishloq xoʻjaligi texnikasi chetdan keltirilgan va bu uning tannarxida aks etgan. «Qashqadaryoda dehqonlarimizning ogʻirini yengil qiladigan, oʻzimizning brendimiz bilan zamonaviy texnikalar ishlab chiqarish bir paytlar faqat orzu edi», — dedi prezident.