VEON Oʻzbekistondagi Perfectum operatorining 100 foizini 207 million dollarga sotib olmoqda

Bitimning umumiy summasi qariyb 207 million dollarni tashkil etadi, bunga Perfectum kompaniyasining taxminan 93 million dollarlik moliyaviy qarzini oʻz zimmasiga olish ham kiradi. Xaridning pul qismini xolding oʻz mablagʻlari hisobidan moliyalashtiradi. VEON maʼlumotlariga koʻra, tartibga soluvchi organlarning ruxsatlari allaqachon olingan, xaridni yakunlash esa 2026-yil oktabr oyi oxirigacha rejalashtirilgan.

Xolding ixtiyoriga Perfectum kompaniyasining 850 va 3800 MGts diapazonlaridagi 115 MGts hajmdagi chastota resurslari, tarmoq uskunalari va infratuzilmasi, shu jumladan Nokia yechimlari asosida yoʻlga qoʻyilgan 5G Standalone tarmogʻi oʻtadi. Bitim natijasida Beeline Uzbekistan umumiy chastota portfeli taxminan 50 foizga oʻsadi.

Sotib olingan quvvatlarni amaldagi 4G/LTE tarmogʻining sigʻimi va qamrovini oshirishga, 5G xizmatlarini rivojlantirishga, shuningdek, aholi va biznes uchun simsiz keng polosali internetga belgilangan ulanish imkoniyatini kengaytirishga yoʻnaltirish rejalashtirilmoqda. Bundan tashqari, xolding infratuzilmani integratsiya qilish hisobiga kelgusi kapital va operatsion xarajatlarni qisqartirishni koʻzlamoqda.