Mirziyoyev Qarshida Nasaf traktorlarini yigʻish zavodiga tashrif buyurdi

Zavod Xitoyning 500 ta eng yirik xususiy kompaniyasi roʻyxatiga kiritilgan Xitoyning Jiangsu World Group korporatsiyasi tarkibiga kiradi. Qiymati 20 million dollar boʻlgan loyiha toʻliq xorijiy investorlar tomonidan moliyalashtirildi. Maydoni 5 gektarni egallaydi, ishlab chiqarish binolari uchun 12 ming kvadrat metr ajratilgan. Korxonada 200 ta ish oʻrni yaratilgan, jarayonlarning bir qismi avtomatlashtirilgan.

Zavod assortimenti — beshta rusumdagi traktorlar, shuningdek, paxta terish mashinalari va boshqa texnikalardan iborat. Traktorlar GPS-navigatsiya va avtopilot bilan jihozlanmoqda, oʻgʻitlar masofadan turib kiritiladi va nazorat qilinadi. Traktorlarni yigʻish 30 foizga mahalliylashtirilgan: zavodning oʻzida 138 turdagi qismlar va butlovchilar tayyorlanadi. Tashrif davomida butlovchi qismlarni oʻzimizda ishlab chiqarish va mahalliy korxonalar bilan kooperatsiya orqali mahalliylashtirish ulushini bosqichma-bosqich oshirish zarurligi aytildi.

Zavod, shuningdek, mashinalarga dalada xizmat koʻrsatish, nosozliklarni erta aniqlash va xavfsiz ekspluatatsiya qilish boʻyicha oʻqitishni ham amalga oshiradi. Rejalarda — mahsulotning 30 foizini qoʻshni mamlakatlarga joʻnatish va yillik eksportni 50 million dollarga yetkazish koʻzda tutilgan.

Mirziyoyevning soʻzlariga koʻra, shu paytgacha qishloq xoʻjaligi texnikasi chetdan olib kelingan va bu uning tannarxida aks etgan. «Qashqadaryoda dehqonlarimizning ogʻirini yengil qiladigan zamonaviy texnikaning oʻz brendimiz ostida ishlab chiqarilishi bir paytlar shunchaki orzu edi», — dedi prezident.