UzPost’dagi davlat ulushi Wildberries tuzilmasiga topshirildi

Yagona korporativ axborot portalida e’lon qilingan hujjatga koʻra, Vazirlar Mahkamasining 2025-yil 13-oktabrdagi qarori asosida 2025-yil 30-dekabrda bir yil muddatga №01/3-94-sonli ishonchli boshqaruv shartnomasi imzolangan. Bundan bir oy oldin, 2025-yil 26-noyabrda Istiqbolli loyihalar milliy agentligi WB INT EXPORT kompaniyasiga investitsiya aktivlarini ishonchli boshqarish uchun litsenziya bergan.

Sentabrdagi yigʻilish yakunlariga koʻra, Wildberries & Russ tuzilmalari vakillari uch yil muddatga UzPost kuzatuv kengashidagi toʻqqizta oʻrindan beshtasini olib, koʻpchilik ovozga ega boʻldi. Shu bilan birga, aksiyadorlar iqtisodiy jihatdan asoslanmagan degan shubhalar tufayli Wildberries’dan yillik 14 foiz stavkada 100 mlrd soʻm miqdorida qarz jalb qilish toʻgʻrisidagi taklifni rad etishdi.

Shu bilan birga, Davlat aktivlarini boshqarish agentligi direktori Sohibjon Murodov 8-oktabr kuni boʻlib oʻtgan matbuot anjumanida ishonchli boshqaruv boʻyicha amaldagi kelishuv mavjudligini rad etib, faqat hamkorlik toʻgʻrisidagi shartnoma borligini ma’lum qildi. Murodov hozirda 360 mlrd soʻmlik foizsiz kredit liniyasini ochish boʻyicha dastlabki muzokaralar olib borilayotganini qoʻshimcha qildi.