UzPost aksiyadorlari Wildberries’dan 100 mlrd soʻmlik qarz olishni maʼqullamadi

Yagona korporativ axborot portali (YKAP) maʼlumotlariga koʻra, aksiyadorlarning navbatdan tashqari yigʻilishi 21-sentabr kuni 93,69% kvorum bilan boʻlib oʻtdi. Ovoz berishga UzPost tomonidan "WB INT EXPORT" MChJdan MB qayta moliyalash stavkasi boʻyicha 100 mlrd soʻm qarz jalb qilish, mablagʻlarni qaytarish jadvali va kompaniya aksiyalarini keyinchalik bekor qilish sharti bilan qaytarib sotib olishni oʻz ichiga olgan yirik bitim olib chiqildi. Ushbu band boʻyicha ishtirokchilarning 100 foizi betaraf qoldi, shu sababli qarorlar qabul qilinmadi.

Shu bilan birga, aksiyadorlar avvalgi kuzatuv kengashining vakolatlarini muddatidan oldin tugatdi va toʻqqiz kishidan iborat yangi tarkibni uch yilga tasdiqladi. Oʻrinlarning koʻp qismini — beshtasini — Wildberries & Russ birlashgan kompaniyasi ("RVB" MChJ) va uning tuzilmalari vakillari egalladi: Akmal Primkulov ("WB INT EXPORT" MChJ), Yevgeniy Mitin, Emil Xasyanov, Pavel Logunov (uchalasi ham — "RVB" MChJ) va Aleksandra Xmeleva ("VB Bank" MChJ).

Davlat tuzilmalaridan kuzatuv kengashiga raqamli texnologiyalar vazirining birinchi oʻrinbosari Oleg Pekos, Hisob palatasi mutaxassisi Shahzod Usarov va Iqtisodiyot va moliya vazirligi boshqarma boshligʻi Muzzafar Astonakulov kirdi. Toʻqqizinchi ishtirokchi mustaqil aʼzo Rojer Kruk boʻldi.

Wildberries matbuot xizmati Spot nashriga kompaniya vakillari pochta operatori boshqaruv organiga "pochta operatorini modernizatsiya qilish, koʻrsatilayotgan xizmatlar sifati va tezligini oshirish" maqsadida kirganini maʼlum qildi. Pochta xizmati oʻz faoliyatini odatdagi tartibda davom ettiradi.