Samarqandda Qoradaryo ustidan 310 mlrd soʻmlik koʻprik qurilmoqda

Qiymati 310 milliard soʻm boʻlgan inshoot qurilayotgan «Shirin» turar joy massivini Samarqand shahri va xalqaro aeroport bilan bogʻlaydi. Koʻprik uzunligi 780 metr, kengligi 29,8 metrni tashkil etadi, qatnov qismi toʻrtta harakatlanish boʻlagini oʻz ichiga oladi. Obyektning oʻtkazuvchanlik qobiliyati sutkasiga 25 mingtagacha transport vositasiga moʻljallangan.

Matbuot xizmati maʼlumotlariga koʻra, obyekt ishga tushirilgach, «Shirin» massividan Samarqand markazigacha boʻlgan masofa 23 kilometrdan 4 kilometrgacha qisqaradi, yoʻl vaqti esa 30 daqiqaga kamayadi. Loyiha transport oqimlarini maqbullashtirish, yoʻllardagi tirbandlikni kamaytirish va harakat xavfsizligini oshirishga qaratilgan.

Koʻzdan kechirish chogʻida davlat rahbariga obyektning texnik sxemalari va harakatni boshqarish variantlari taqdim etildi. Mahalliy faollar bilan uchrashuvda Prezident transport logistikasining muhimligini taʼkidlab, Samarqand 2016-yilda butun Oʻzbekistonga kelgan 1,2 million mehmon bilan taqqoslaganda, hozirda har yili 5 million sayyohni qabul qilayotganini eslatib oʻtdi.