Transport vazirligi Urganch — Xiva pulli trassasi tariflari va qoidalarini tasdiqladi

Buyruq Iqtisodiyot va moliya vazirligi hamda Ichki ishlar vazirligi bilan kelishilganidan soʻng transport vaziri Ilhom Mahkamov tomonidan imzolandi. Hujjat transport toifasi va yoʻl qismiga bogʻliq boʻlgan cheklangan tariflarni belgilaydi. Uzunligi 35 km boʻlgan Urganch — Xiva uchastkasida yengil avtomobillar va mototransport uchun eng yuqori toʻlov BHMning 4 foizini (17 600 soʻm), mikroavtobuslar uchun — 44 000 soʻmni (BHMning 10 foizi), avtobuslar uchun — 66 000 soʻmni (BHMning 15 foizi) tashkil etadi. Ikki va uch oʻqli yuk mashinalari 88 000 soʻmgacha (BHMning 20 foizi), toʻrt va undan ortiq oʻqli mashinalar hamda avtopoyezdlar esa 132 000 soʻmgacha (BHMning 30 foizi) toʻlaydi. 28 kilometrlik Yangiariq — Xiva qismida yengil avtomobil harakati 14 520 soʻmga (BHMning 3,3 foizi) tushadi.

Yoʻlda shlagbaumli toʻsiqli tizim hamda raqamlarni kameralar orqali avtomatik oʻqiydigan toʻsiqsiz tizim koʻzda tutilgan. Yoʻl haqini elektron hisob orqali, toʻlov punktida, yoʻl talonini xarid qilish yoʻli bilan yoki toʻlovni kechiktirish orqali toʻlash mumkin. Toʻlov kechiktirilganda, haydovchi kvitansiya yuborilganidan keyin besh ish kuni ichida mablagʻni kiritishi shart. Toʻlanmagan taqdirda, operator qarzni sud orqali undirishga haqli, shundan soʻng avtomobilga texnik koʻrikdan oʻtish, sotish, qayta roʻyxatdan oʻtkazish yoki mamlakatdan olib chiqib ketish boʻyicha cheklovlar qoʻllanishi mumkin. Haydovchilar qarzdorlik ustidan sudga yoki Avtomobil yoʻllari qoʻmitasiga shikoyat qilish huquqiga ega, operator esa shikoyatni besh ish kuni ichida koʻrib chiqishi shart.

Trassaga piyodalar, yirik gabaritli, ogʻir vaznli transportlar, qishloq xoʻjaligi va maxsus texnikalar, xavfli yuk tashiydigan mashinalar, shatakka olingan transportlar, shuningdek dvigatel hajmi 25 kub sm dan kam yoki quvvati 0,25 kVt dan past boʻlgan velosiped, moped va skuterlarning kirishi taqiqlanadi. Yigʻilgan mablagʻlar trassani saqlash va taʼmirlash uchun Iqtisodiyot va moliya vazirligi huzuridagi Avtomobil yoʻllarini rivojlantirish maqsadli jamgʻarmasiga, qoldigʻi esa uni qurish uchun jalb qilingan kreditlarni soʻndirishga yoʻnaltiriladi. Vaqtinchalik nizom Vazirlar Mahkamasining pulli yoʻllardan foydalanishning umumiy tartibi toʻgʻrisidagi qarori qabul qilingunga qadar amal qiladi.