Toshkentda Transkaspiy transport yoʻlagi boʻyicha konferensiya boʻlib oʻtdi

Forum Yevropa Ittifoqi tomonidan moliyalashtiriladigan, Markaziy Osiyoning beshta davlati, YI, xalqaro moliya institutlari va rivojlanish boʻyicha hamkorlarni birlashtirgan Global Gateway strategiyasining Muvofiqlashtiruvchi platformasi doirasida oʻtkazildi. Ishtirokchilar investitsiyalarni jalb qilish, avtomobil va temir yoʻllarni modernizatsiya qilish, bojxona tartib-taomillarini uygʻunlashtirish hamda elektron hujjat aylanishiga oʻtish masalalarini muhokama qildilar.

Oʻzbekiston transport vaziri Ilhom Mahkamov mamlakatda faoliyat yuritayotgan 27 ta transport-logistika markazidan 24 tasi BMT ESKATO bitimiga koʻra xalqaro ahamiyatga ega "quruq portlar" roʻyxatiga kiritilganini maʼlum qildi. U, shuningdek, CASCA+ multimodal yoʻnalishi boʻylab temir yoʻl tashuvlariga 70 foizlik chegirmalar joriy etilgani hamda Xitoy — Qirgʻiziston — Oʻzbekiston liniyasi qurilishi va Gruziya portlarida oʻz terminalini yaratish kabi loyihalar ilgari surilayotganini eslatib oʻtdi.

Yevropa komissiyasining Xalqaro hamkorlik va rivojlanish boʻyicha Bosh direktorati direktori Peteris Ustubs yoʻnalishni Markaziy Osiyo va Janubiy Kavkaz davlatlarini oʻz ichiga olgan yaxlit tizim sifatida koʻrib chiqish zarurligini taʼkidladi. Uning soʻzlariga koʻra, toʻsiqlarni bartaraf etish hamda yuklarni yetkazib berish muddatlari va shartlarining oldindan aniqligi yoʻlak jozibadorligining asosiy omillari boʻlib qolmoqda.