Spotify tavsiyalardan sun’iy intellekt yaratgan 50 mln dan ortiq trekni olib tashladi

Bunday treklarni aniqlash uchun servis birdaniga bir nechta belgilarni hisobga oladi: tinglovchilarning munosabati va fikrlari, metama’lumotlar, yuklash qonuniyatlari, shuningdek, begona sun’iy intellekt kontenti detektorlari natijalari. Kompaniya detektorlar adashishi mumkinligini, shu sababli signallar koʻpligini tushuntirmoqda: bu orqali tavsiyalardan haqiqiy ijrochilarni xatolik bilan olib tashlash xavfi kamayadi. Bundan tashqari, spam deb topilgan 75 mln dan ortiq kompozitsiyani Spotify platformadan butunlay oʻchirib yubordi — 3DNews ma’lumotlariga koʻra, bu oʻtgan yili yuz bergan.

Haqiqiy inson boʻlmagan va sun’iy ravishda yaratilgan obraz ostida faoliyat yurituvchi artistlar AI Persona («SI-shaxs») belgisini oladi. Odatiy holatda ularning musiqasi algoritmik tavsiyalarga va tahririyat pleylistlariga kiritilmaydi, biroq bunday ijrochining obunachilari uning treklarini toʻplamlarda koʻrishda davom etadi. Servis SI qoʻllanilgan barcha musiqa uchun majburiy markirovkalashni joriy qilmadi, ammo musiqachilar neyrotarmoqlardan nima maqsadda — vokal, instrumental, matn yoki prodyuserlik uchun foydalanganliklarini koʻrsatishlari mumkin. Bu ma’lumotlar mobil ilovaning Song Credits boʻlimida aks etadi.

Kompaniya, shuningdek, 300 mingdan ortiq haqiqiy musiqachilarning verifikatsiya qilingani hamda mualliflarga oʻz nomlari ostidagi relizlarni kuzatib borish va xato bogʻlanishlarni olib tashlash imkonini beruvchi Artist Profile Protection vositasi haqida xabar berdi (Habr ma’lumotlariga koʻra, u 2026-yil oxirigacha chiqariladi). 2024-yildan buyon Spotify’da ming marta tinglashdan iborat monetizatsiya chegarasi amal qilmoqda; servis ma’lumotlariga qaraganda, ehtimol SI tomonidan yaratilgan treklar boshqalarga nisbatan oʻn barobar koʻproq holatda ushbu koʻrsatkichga yeta olmayapti.