300 mingta IT-o‘rni bo‘yicha maqsad muddatidan oldin bajarildi, yangi marra — yana 500 mingta

Endilikda 2030-yilga qadar raqamli iqtisodiyotning yangi yo‘nalishlari hisobiga qo‘shimcha 500 mingta ish o‘rni yaratish lozim bo‘ladi. Matbuot xizmati maʼlumotlariga ko‘ra, buning uchun o‘qish va ko‘nikmalarni tasdiqlashdan tortib ishga joylashishgacha bo‘lgan butun yo‘lni qamrab oluvchi yagona raqamli taʼlim ekotizimi zarur. Taqdimotda 2030-yilgacha anʼanaviy va masofaviy shaklda 5,5 million yoshlarni o‘qitish rejalashtirilgan yondashuvlar muhokama qilindi.

Davlat rahbari har yili robototexnika, kompyuter o‘yinlarini yaratish, startaplar va boshqa istiqbolli yo‘nalishlar bo‘yicha 1 million yoshlarni tayyorlash vazifasini qo‘ydi. Maktab o‘quvchilari uchun «Al-Xorazmiy vorislari» hamda «Besh million sunʼiy intellekt yetakchisi» loyihalarini kengaytirish rejalashtirilmoqda. Farg‘ona tajribasiga tayanib iOS dasturchilarini tayyorlash markazlarini ochish va xususiy o‘quv markazlari uchun mentorlarni tayyorlash bo‘yicha takliflar maʼqullandi. OTMlarga sunʼiy intellekt, mikrosxemalarni loyihalash, uchuvchisiz texnologiyalar va o‘yinlar ishlab chiqish sohasida kadrlarni tayyorlashni rivojlantirish taklif etildi.

2025-yilda raqamli taʼlimga 22 million dollar miqdorida grantlar jalb etishga erishildi. 2026-yil oxiriga kelib maqsadli hajm 60 million dollarni, 2030-yilga borib esa 100 million dollarni tashkil etadi. Bu yilgi mablag‘larning yarmi bevosita raqamli taʼlimga, ikkinchi yarmi esa malaka oshirishga, shuningdek, chekka hududlarda dasturlash, robototexnika va sunʼiy intellekt bilan shug‘ullanish uchun markazlarni ochish va jihozlashga yo‘naltiriladi.

Shuningdek, «Raqamli yoshlar» platformasi bo‘yicha rejalar ham ko‘rib chiqildi. Rejaga ko‘ra, unda yoshlarning taʼlimi, ko‘nikmalari, til bilishi va sertifikatlari haqidagi maʼlumotlar jamlanadi, platformaning o‘zi esa vakansiyalarni tanlashda ko‘maklashadi va ishga joylashish hisobini yuritadi.