Spotify tavsiyalardan sun’iy intellekt yaratgan 50 milliondan ortiq trekni olib tashladi

Bunday treklarni aniqlash uchun servis bir vaqtning oʻzida bir nechta belgilarni hisobga oladi: tinglovchilarning munosabati va sharhlari, metamaʼlumotlar, yuklash qonuniyatlari hamda tashqi sun’iy intellekt kontenti detektorlarining natijalari. Kompaniya detektorlar xato qilishi mumkinligini, shu sababli signallar koʻpligini tushuntirmoqda: bu orqali haqiqiy ijrochilarni tavsiyalardan xatolik bilan chiqarib tashlash xavfi kamaytiriladi. Bundan tashqari, Spotify spam deb topilgan 75 milliondan ortiq kompozitsiyani platformadan butunlay oʻchirib yubordi.

Haqiqiy odam boʻlmagan va sun’iy ravishda yaratilgan obraz ostida ijod qiladigan artistlar AI Persona («SI-shaxs») belgisini oladi. Odatiy holatda ularning musiqasi algoritmik tavsiyalar va tahririyat pleylistlariga kirmaydi, biroq bunday ijrochining obunachilari uning treklarini toʻplamlarda koʻrishda davom etadilar. Servis sun’iy intellekt qoʻllangan barcha musiqa uchun majburiy markirovka joriy qilmadi, ammo musiqachilar neyrotarmoqlardan nima maqsadda — vokal, instrumental, matn yoki prodyuserlik uchun foydalanganliklarini koʻrsatishlari mumkin. Ushbu maʼlumotlar mobil ilovaning Song Credits boʻlimida aks ettiriladi.

Kompaniya, shuningdek, 300 mingdan ortiq haqiqiy musiqachilar verifikatsiyadan oʻtkazilgani hamda mualliflarga oʻz nomlari ostidagi relizlarni kuzatib borish va notoʻgʻri biriktirishlarni olib tashlash imkonini beruvchi Artist Profile Protection vositasi haqida maʼlum qildi (Habr maʼlumotlariga koʻra, u 2026-yil oxirigacha chiqariladi). 2024-yildan buyon Spotifyʼda ming marta tinglashdan iborat monetizatsiya chegarasi amal qilmoqda; servis maʼlumotlariga koʻra, ehtimol sun’iy intellekt tomonidan yaratilgan treklar ushbu koʻrsatkichga boshqalarga qaraganda oʻn barobar kamroq erishmoqda.