PHP dasturchilari ikkita oʻta xavfli zaiflik uchun shoshilinch patch chiqarilishini eʼlon qildi

Zararlangan versiyalar roʻyxati, tuzatilgan yigʻilmalar va texnik tafsilotlarni dasturchilar patch bilan birga eʼlon qilishga vaʼda bermoqda. Agar xatolar haqidagi maʼlumotlar ommaga oshkor boʻlsa yoki ulardan hujumlarda foydalanish belgilari paydo boʻlsa, tuzatish ertaroq chiqishi mumkin. Server administratorlariga PHP rasmiy saytini kuzatib borish va relizdan soʻng darhol tizimni yangilash tavsiya etiladi.

Kod.ru nashrining Ars Technicaʼga tayanib xabar berishicha, eʼlondan avval tasdiqlanmagan maʼlumotlar tarqalgan: internetda PHP2Shell vositasi WordPress, MediaWiki, Joomla, Drupal va boshqa platformalardagi saytlarda ixtiyoriy kodni ishga tushirishi daʼvo qilingan video paydo boʻldi. watchTowr axborot xavfsizligi kompaniyasi maʼlumotlariga koʻra, zaifliklarga CVE-2026-109618 va CVE-2026-109619 identifikatorlari berilgan boʻlib, ularning ikkalasi ham kodni masofadan bajarish imkonini beradi. PHP 5 dan boshlab barcha versiyalar xavf ostida ekani haqidagi maʼlumotlar rasman tasdiqlanmagan; 21-oktabr holatiga koʻra, ulardan amalda foydalanilgani xabar qilinmagan.

Wordfence kompaniyasi WordPressʼdagi barcha saytlar zaif boʻlib qolishi, PHP yangilanishini esa qoʻlda oʻrnatish kerakligidan ogohlantirdi. Tadqiqotchilardan birining hisob-kitoblariga koʻra, ehtimol, internetga ulangan 1,3 milliondan ortiq xost xavf ostida. Yevropa Ittifoqi kiberxavfsizlik xizmati (EU CERT) va Buyuk Britaniya Milliy kiberxavfsizlik markazi darhol yangilanish imkoniyatiga ega boʻlmagan kompaniyalarga internet orqali kirish mumkin boʻlgan ilovalarni ommaviy tarmoqlardan ajratib qoʻyishni yoki ularni vaqtincha oʻchirib turishni tavsiya qildi. GrapheneOS dasturchisi oʻz forumini foydalanuvchilar uchun vaqtincha yopdi.