Oʻzbekistonda Google Pay toʻlov xizmati ishga tushirildi

Ishga tushirilganlik haqida Google Cloud'ning davlat siyosati va davlat organlari bilan aloqalar yoʻnalishi rahbari Martsin Krasuski maʼlum qildi. Bayonot Markaziy Osiyo mamlakatlari va AQSh vakillari oʻrtasidagi "C5+1" formatidagi uchrashuv chogʻida yangradi, nutqning videoyozuvini Oʻzbekiston Raqamli texnologiyalar vazirligi matbuot xizmati eʼlon qildi.

Xizmat mazkur texnologiyani qoʻllab-quvvatlaydigan terminallarda biriktirilgan bank kartalari orqali smartfon yordamida kontaktsiz toʻlovlarni amalga oshirish, shuningdek internet va mobil ilovalarda toʻlov qilish imkonini beradi.

Tizimning ishga tushirilishidan oldin shaxsga doir maʼlumotlar toʻgʻrisidagi qonunchilikka oʻzgartirishlar kiritildi. Prezident Shavkat Mirziyoyev tomonidan 2026-yil 26-martda imzolangan OʻRQ-1125-sonli qonun muayyan shartlarga rioya qilingan holda shaxsga doir maʼlumotlarni mamlakatdan tashqarida qayta ishlash va saqlashga ruxsat berdi. Oʻzbekiston ichidagi serverlarda majburiy saqlash talabi faqat biometrik va genetik axborotlar, shuningdek telekommunikatsiya operatorlari abonentlarining maʼlumotlari uchungina oʻz kuchida qoldi.