GeForce RTX 5090 ishlab chiqarilishi toʻxtatilishi haqidagi mish-mishlar fonida chakana savdodan yoʻqolmoqda

iXBT.com taʼkidlashicha, Nvidia rasmiy veb-saytida modelning axborot sahifasi saqlanib qolgan, biroq brendning rasmiy marketpleysida videokarta endi mavjud mahsulotlar roʻyxatida va katalog filtrida koʻrinmayapti. Nvidia kompaniyasi ishlab chiqarish toʻxtatilgani haqida rasmiy bayonot bermagan.

Shu bilan birga, AQSHning Micro Center elektronika doʻkonlari tarmogʻi ushbu flagman kartani yangi partiyalarni kutmasdan mahsulotni katalogdan chiqarib tashlashni anglatuvchi «Taklif etilmaydi» (Not Carried) holatiga oʻtkazdi, deya xabar bermoqda 3DNews Tom's Hardware nashriga tayanib. Boshqa brendlarning hamkorlikdagi modellari ham tarmoqning oflayn doʻkonlarida tugagan.

iXBT.com nashrining distribyutorlar va ishlab chiqaruvchi hamkorlarining maʼlumotlariga tayangan PC Games Hardware nashriga asoslanib yozishicha, Nvidia RTX 5090 ning isteʼmolchilar versiyasini chiqarish uchun yangi GB202 grafik protsessorlarini ajratishni toʻxtatgan. Ushbu maʼlumotlarga koʻra, sotuvchilar kartalarni faqat avval yetkazib berilgan chiplar partiyasidan yigʻishlari mumkin, ammo qoʻshimcha kvotalar olishmayapti.