SpaceX Texasda Starshipʼni yiliga 456 marta uchirishga ruxsat soʻradi

Starbase bazasi uchun amaldagi limit yiliga 25 ta uchirish va 50 ta qoʻnishni tashkil etadi. Yangi soʻrovda kompaniya, shuningdek, yiliga 912 tagacha Starship kosmik kemalari va Super Heavy tezlatkichlarini qoʻndirishga ruxsat olishni kutmoqda, bu esa komponentlarni quruqlikka qoʻndirish yoki suvga tushirish imkonini beradi.

Dasturni kengaytirish jarayonini ikki bosqichga boʻlish rejalashtirilmoqda. Birinchi bosqichda chastota kunning istalgan vaqtida yiliga taxminan 100 ta uchirish va 200 ta qoʻnishni tashkil etadi. Ikkinchi bosqichda SpaceX bir necha yil ichida 456 tagacha uchirish koʻrsatkichiga chiqishni moʻljallamoqda. FAA xabarida qayd etilishicha, ikkinchi bosqichda uchirishlar dushanbadan jumagacha kechayu kunduz amalga oshirilishi koʻzda tutilgan.

Murojaat munosabati bilan regulyator va AQSH Transport vazirligi ekologik baholashni tayyorlashga kirishdi. Mutaxassislar atrof-muhitga ortgan yuklama oqibatlarini, havo sifatini, mintaqaviy aviaqatnovlardagi ehtimoliy uzilishlarni va yerusti infratuzilmasining ishlashini baholaydilar. Hisobot loyihasi jamoatchilik muhokamasiga qoʻyiladi.