Oʻzbekiston robototexnika terma jamoasi jahon chempionatidagi gʻalabadan soʻng taqdirlandi

Davlat rahbari farmoniga koʻra, jamoa bosh murabbiyi Ziyodulla Butaxonov «Sodiq xizmatlari uchun» medali bilan taqdirlandi. «Kelajak bunyodkori» medali terma jamoa sardori Ibrohim Salomov, texnik murabbiy Abdulloh Abdujabborov, menejerlar Safina Teshabaeva va Hasanxon Yusuphujaevga, shuningdek, terma jamoaning toʻqqiz nafar aʼzosi: Shohruhbek Akbarov, Akbarshoh Qosimov, Ayubxon Mirahmedov, Umarbek Pardayev, Shukrullo Sodiqov, Mahkambek Teshabaev, Jasurbek Tojiquziyev, Bahodir Oʻrmonov va Xondamir Oʻrmonovga berildi.

FIRST Global Challenge 2026 xalqaro musobaqalari 7-10-oktyabr kunlari Janubiy Koreyada Igniting Innovation («Innovatsiyalarni alanga oldirib») shiori ostida boʻlib oʻtdi. Turnir mavzusi oʻrmon yongʻinlari hamda ularga qarshi kurashish, oqibatlarini bartaraf etish va hududlarni qayta tiklash uchun texnologik yechimlar yaratishdan iborat boʻldi.

Turnirda Oʻzbekiston jamoasi barcha 16 ta oʻyinda gʻalaba qozondi, 637 ball natija bilan musobaqa rekordini oʻrnatdi va uchta oltin medalni qoʻlga kiritib, qariyb 200 mamlakat (Uznews va Kursiv maʼlumotlariga koʻra — 190 ga yaqin mamlakat) vakillari orasida birinchi oʻrinni egalladi.