Fransiyadagi yuzlab supermarketlar muzlatkichlariga kiberhujum uyushtirildi

Xakerlar Daniyaning Danfoss kompaniyasiga tegishli uskunalarning sozlamalarini masofadan oʻzgartirib, qurilmalarni olti soatgacha boʻlgan muddatga haroratni 50 °C gacha koʻtaradigan eritish rejimiga oʻtkazgan. Bu mahsulotlarning buzilishiga olib keldi, natijada savdo tarmoqlari ularni utilizatsiya qilishga majbur boʻldi, shuningdek, ayrim joylarda yongʻinlar yuzaga keldi.

Butun mamlakat boʻylab bir nechta yirik chakana savdo tarmoqlarining doʻkonlari zarar koʻrdi. Intermarché tarmogʻi egasi — Les Mousquetaires kompaniyasi — taxminan 150 ta doʻkonda nosozlik yuz berganini bildirdi (France24 telekanali 200 tagacha deb baholagan). Coopérative U tarmogʻida 100 ga yaqin savdo nuqtasi jabrlangan, Carrefour riteyleri esa taxminan 6 mingta doʻkondan 80 tasiga hujum qilingani haqida xabar berdi. Parij prokuraturasi hodisa koʻlamini, kiberhujumning oziq-ovqat yoʻqotishlari va yongʻin oʻchoqlari bilan bogʻliqligini tekshirmoqda.

Fransiyaning CERT-FR javob choralarini koʻrish markazi Danfoss kompaniyasining AK-SM va AK-SC seriyali kontrollerlari buzilgani haqida ogohlantirish berib, boshqaruv interfeysini internetga ochiq qoldirish mumkin emasligini taʼkidladi. Ishlab chiqaruvchi Danfoss zarar koʻrgan tizimlarda eskirgan dasturiy taʼminot oʻrnatilganini maʼlum qildi. Fransiya bosh vaziri Sebastyan Lekornyu topshirigʻiga binoan tergovga ANSSI agentligi ham qoʻshildi, u shuningdek yevropalik hamkorlar bilan harakatlarni muvofiqlashtirmoqda.