"Yandeks" "Yandeks 360" va "Disk" xizmatlari funksiyalarini vaqtincha chekladi

Kompaniya Kod.ru nashriga texnik muammolar fonida xizmatlarning asosiy ish faoliyatini saqlab qolish uchun bu choralar ataylab koʻrilganini tasdiqladi. Cheklovlar qachon bekor qilinishining aniq muddatlarini kompaniya maʼlum qilmadi va muhandislar toʻliq funksionallikdan foydalanish imkoniyatini tiklashda davom etayotganini taʼkidladi.

Bulutli xotira foydalanuvchilari fayllarni yuklashga urinishda nosozliklarga duch kelishdi: baʼzi maʼlumotlar interfeysda koʻrinmoqda, biroq tarmoq javobini kutish xatosi tufayli yuklab olinmayapti, hujjatlarning bir qismida esa oldindan koʻrish (prevyu) tasvirlari aks etmay qolgan.

Avvalroq kompaniya infratuzilmaga yetkazilgan zarar tufayli Vladimir viloyatidagi maʼlumotlar markazi toʻxtatilganini va Yandex Cloud platformasi avariya rejimiga oʻtkazilganini maʼlum qilgan edi. 11-oktyabr oqshomida kompaniya matbuot xizmati qidiruv tizimi, xaritalar, taksi va pochta xizmatlari faoliyatini bosqichma-bosqich tiklash boshlangani haqida hisobot berdi.