SpaceX Starlink mobil tarmogʻini rivojlantirish uchun chastotalar sotib olmoqda

Sotib olinayotgan litsenziyalar portfeli AQSH hududidagi 800 MGts diapazonidagi (14 MGts gacha juftlashgan spektr) chastotalarni oʻz ichiga oladi. SpaceX past chastotalar signalni uzoq masofalarga uzatish va bino konstruksiyalaridan oʻtib, binolar ichida aloqani yaxshiroq taʼminlash imkonini berishini taʼkidladi. Korxona qoʻshimcha sunʼiy yoʻldosh uskunalarisiz oddiy smartfonlarga aloqa xizmatini koʻrsatish uchun Starlink sunʼiy yoʻldosh guruhini yer usti infratuzilmasi bilan birlashtirishni rejalashtirmoqda.

«Bu SpaceX kompaniyasiga Amerikada toʻliq telefon qamrovini taʼminlash uchun zarur boʻlgan chastota spektrining soʻnggi eng muhim elementidir», — dedi Ilon Mask. Bitimni yakunlash uchun tomonlar AQSH Federal aloqa komissiyasi (FCC) roziligini olishlari kerak. Avvalroq kompaniya EchoStarʼdan 2 GGs diapazonidagi chastotalarni ham sotib olgan edi.

Bundan tashqari, FCC regulyatori SpaceXʼga jami 15 mingta ikkinchi avlod Starlink sunʼiy yoʻldoshlarini joylashtirishga ruxsat berdi. Kompaniyaning taʼkidlashicha, ularning oʻtkazuvchanlik qobiliyati avvalgi seriyadagi apparatlar koʻrsatkichlaridan 100 barobardan koʻproqqa yuqori boʻladi. Starlink Mobile tarmogʻini yaratish rejalari haqidagi xabarlar fonida Verizon, AT&T va T-Mobile operatorlarining umumiy bozor kapitallashuvi taxminan 62 milliard dollarga qisqardi, deb xabar beradi Financial Times.