Zararli RedWing Stealer dasturi Oʻzbekistonning 12 ta bankini nishonga oldi

F6 tadqiqoti maʼlumotlariga koʻra, 2026-yilning mayidan sentyabriga qadar mutaxassislar dasturning 800 dan ortiq namunasini aniqladilar. Oʻzbekiston banklaridan tashqari, dasturiy taʼminot 16 ta Rossiya va yettita Qozogʻiston banki, shuningdek, toʻqqizta Rossiya marketpleysi va sakkizta mikromoliya tashkiloti mijozlariga qaratilgan. Hisobotda Oʻzbekistonning 12 ta moliya muassasasi nomlari oshkor etilmagan, mamlakatdagi jabrlangan foydalanuvchilar va yetkazilgan zarar miqdori haqidagi maʼlumotlar esa keltirilmagan.

Dastur VPN-xizmatlar, mediafayllarni koʻrish uchun utilitalar va mobil oʻyinlarning modifikatsiyalarini oʻz ichiga olgan uchinchi tomon APK-fayllari niqobi ostida yashirinadi. Ishga tushirilgandan soʻng, ilova SMS-xabarlarni qayta ishlash, avtomatik ishga tushish va fonda ishlash uchun ruxsat soʻraydi, soʻngra PIN-kodni kiritishni taklif qilib, uni masofaviy serverga yuboradi. Dastur bank xizmatlarining bildirishnomalari va xabarlarini tutib olish, kontaktlar, joylashuv va SIM-kartalar haqidagi maʼlumotlarni toʻplash, mustaqil ravishda USSD-soʻrovlarni bajarish, SMS yuborish va oʻz belgisini (ikonkasini) yashirish imkoniyatiga ega.

F6 norasmiy manbalardan APK-fayllarni yuklab olishdan voz kechishni, soʻralayotgan ruxsatlarni tekshirishni va shubhali shakllarda shaxsiy maʼlumotlarni koʻrsatmaslikni tavsiya qiladi. Zararlanish holatida ekspertlar ilovani oʻchirib tashlashni, tizimni himoya dasturi bilan tekshirishni, boshqa qurilmadan parollarni oʻzgartirishni va karta xavf ostida qolgan taqdirda uni bank orqali bloklashni maslahat berishadi.