YouTube kompyuterlar uchun yangilangan interfeysni sinovdan oʻtkazishni boshladi

Yangilangan variantda izohlar bloki, video tavsifi va interaktiv boʻlimlar pleyerning oʻng tomonidagi yon panelga koʻchirildi. Tavsiya etilgan videolar esa toʻgʻridan-toʻgʻri ijro oynasining ostiga yirik miniatyuralar toʻri shaklida joylashtirildi.

Reddit platformasidagi foydalanuvchilar oʻzgarishlarni tanqid qildi. Tomoshabinlar tor yon panel oʻqish uchun noqulay ekanidan, pleyer ostidagi katta kartochkalar esa uzoq davom etadigan videolarni tomosha qilishdan chalgʻitayotganidan va oʻng tarafdagi izohlarda spoylerlardan qochish qiyinlashganidan shikoyat qilishdi. Baʼzi foydalanuvchilar sahifaning avvalgi koʻrinishiga qaytish uchun brauzer kengaytmalari va uBlock Origin filtrlaridan foydalanishni boshladi.

Platforma ushbu maket doimiy boʻlib qolishi yoki yoʻqligini rasman eʼlon qilmadi. Shunga oʻxshash sinov 2024-yilda ham Premium obunachilari orasida oʻtkazilgan edi, biroq oʻshanda xizmat salbiy fikr-mulohazalardan soʻng yangilikdan voz kechgan edi.