SpaceX 15 000 ta Starlink Mobile sun'iy yo'ldoshini uchirish uchun FCC ruxsatini oldi

Regulyator qarori so'rov topshirilganidan qariyb bir yil o'tib, 6-oktabr kuni qabul qilindi. FCC SpaceX kompaniyasiga amaldagi me'yorlardan istisno taqdim etdi: kompaniya yer usti mobil operatorlari bilan chastotalarni ijaraga olish shartnomasini tuzmasdan, sun'iy yo'ldoshlardan to'g'ridan to'g'ri smartfonlarga simsiz aloqa xizmatlarini ko'rsatish huquqiga ega bo'ldi.

SpaceX arizasiga ko'ra, yangi orbital guruh har bir foydalanuvchiga 150 Mbit/s gacha tezlikda aloqa taqdim etishga mo'ljallangan. Hozirgi vaqtda Starlink Mobile tezligi taxminan 4 Mbit/s bo'lgan 650 ga yaqin apparatdan foydalanmoqda va AQSH hududida T-Mobile bilan hamkorlikda ishlamoqda. Regulyator yangi sun'iy yo'ldoshlarni 326 dan 335 km gacha balandlikdagi orbitalarga joylashtirishga, shuningdek, ulardan mahalliy qonunchilikka muvofiq AQSHdan tashqarida ham foydalanishga ruxsat berdi.

Tarmoq faoliyati uchun EchoStar (Boost Mobile bosh kompaniyasi)dan sotib olinadigan 1695 dan 2200 MGts gacha bo'lgan chastota diapazonlari, shuningdek, 1910–1915 MGts va 1990–1995 MGts polosalaridan foydalaniladi. Shu bilan birga, FCC SpaceX kompaniyasining AQSH ichida 2020–2025 MGts diapazonidan va xorijdagi operatsiyalar uchun 1429–2690 MGts polosalaridan foydalanish bo'yicha so'rovlarini ko'rib chiqishni keyinga qoldirdi.