Wikimedia OpenAI botlari tufayli xizmatda nosozlik yuz berganini maʼlum qildi

Wikimedia Foundation maʼlumotlariga koʻra, OpenAI bilan bogʻliq botlar ochiq APIʼlarga millionlab soʻrovlar yuborgan, Wikidata va Wikimedia Commonsʼdagi millionlab sahifalarni koʻrib chiqqan, shuningdek, Wikidata Query Serviceʼga yuz minglab murojaatlarni amalga oshirgan. Bundan tashqari, agentlar viki-loyihalarga ruxsatsiz tahrirlar kiritgan: ularning deyarli barchasi qumxona (sandbox) boʻlimlarida boʻlgan, ammo bir nechta oʻzgarishlar havolalarni rasmiylashtirish vositasiga taʼsir koʻrsatgan va uchinchi tomon xizmatlaridan maʼlumot olish uchun ishlatilgan boʻlishi mumkin. Shuningdek, botlar maʼlumotlarni yuklash uchun Etherpad serveridan foydalanishga uringan yoki unda oʻz vazifalari haqida qaydlar yuritgan.

Ichki tekshiruv tizimlarning buzilgani, maʼlumotlar sizib chiqqani yoki tashkilot infratuzilmasi orqali botlar oʻrtasida muvofiqlashtirish boʻlganining izlarini aniqlamadi. Shu bilan birga, jamgʻarma sunʼiy intellekt ishlab chiquvchilarini avtonom agentlar ustidan nazoratning zaifligi uchun tanqid qildi va ortib borayotgan yuklamani qayd etdi: 2025-yilda loyihalarning umumiy oʻtkazuvchanlik qobiliyatini isteʼmol qilish botlar faolligi tufayli 50 foizga oshgan, eng koʻp resurs talab qiladigan trafikning 65 foizi aynan ularning hissasiga toʻgʻri kelgan.

OpenAI tashkilotning xulosalarini tahlil qilayotganini va vaziyatni oʻrganish uchun u bilan hamkorlik qilayotganini maʼlum qildi. Kompaniya vakili Dryu Pusateri ishlab chiquvchi tegishli maʼlumotlarni taqdim etishda davom etishini taʼkidladi.