Ishlatilgan protsessor xarid qilish Valorant oʻyinida apparat blokirovkasiga sabab boʻldi

Foydalanuvchi Reddit platformasida maʼlum qilishicha, u chipni 21-sentabr kuni Germaniyaning Kleinanzeigen eʼlonlar servisi orqali sotib olgan. Protsessor odatdagidek ishlagan, biroq Valorant ishga tushirilganda Riot Vanguard anticheat tizimi oʻyinchini darhol chiqarib yuborgan. Butlovchi qism almashtirilgunga qadar oʻyin uzluksiz ishlab turgan. Riot Games qoʻllab-quvvatlash xizmati xaridorga protsessor identifikatori avvalgi egasi tomonidan chitlar ishlatilgani sababli 12-avgustda qora roʻyxatga kiritilganini maʼlum qilgan.

Xaridor anticheat keyinchalik ona plata va xotira qurilmasini ham qora roʻyxatga kiritganini, qoʻllab-quvvatlash xizmati esa cheklovni qoʻlda olib tashlashni rad etganini bildirdi. Riot Games vakili Fillip Koskinas ushbu daʼvolarning bir qismini rad etib, Vanguard tizimi bitta bloklangan detal aniqlanganda qolgan butlovchi qismlarni bloklamasligini hamda kompaniya koʻrsatilgan murojaatni topa olmaganini aytdi.

Koskinas apparat cheklovlari faqat aniq bir oʻyinga tegishli ekanligini va toʻrt oydan ortiq davom etmasligini tushuntirdi. Riot qoʻllab-quvvatlash xizmati foydalanuvchining soʻroviga koʻra cheklovni qayta koʻrib chiqishi va blokirovkadan qolgan muddat haqida xabar berishi mumkin.