Qirgʻiziston orbitaga birinchi milliy sunʼiy yoʻldoshini uchirdi

Qurilmaning uchirilishi SpaceX kompaniyasining Falcon 9 eltuvchi raketasi yordamida kosmik sunʼiy yoʻldoshlar guruhi tarkibida amalga oshirildi. Marosimda Qirgʻiziston prezidenti Sadir Japarov ishtirok etdi. Kosmik apparatni Bishkekdagi markazdan boshqarishadi.

Loyiha Qirgʻiziston va Birlashgan Arab Amirliklarining hamkorlikdagi faoliyati doirasida amalga oshirildi. Qurilmani yaratish uchun qariyb 2,5 yil talab etildi. Vazirlar Mahkamasi raisi oʻrinbosari — suv resurslari, qishloq xoʻjaligi va qayta ishlash sanoati vaziri Erlist Akunbekovning maʼlum qilishicha, apparat birinchi navbatda qishloq xoʻjaligini rivojlantirish uchun moʻljallangan.

Sunʼiy yoʻldoshdan olinadigan maʼlumotlar muzliklar, suv obyektlari, oʻrmonlar va yaylovlarni kuzatish, noqonuniy chiqindixonalar va yer osti boyliklaridan foydalanishni aniqlash uchun ham qoʻllaniladi. Bundan tashqari, qurilma suv toshqinlari, sel, koʻchki, qurgʻoqchilik va oʻrmon yongʻinlari xavfini kuzatish imkonini beradi. Kelgusida sunʼiy yoʻldosh maʼlumotlarini fazoviy xaritalar va modellarni yaratish maqsadida davlat raqamli tizimlariga joriy etish rejalashtirilmoqda.