Figure Finlyandiyada odamsimon robotlarni metall eritish pechida yoʻq qildi

Kompaniya utilizatsiyani keyingi Figure 03 rusumiga oʻtish bilan izohladi. Eski avlod robotlarini saqlab turish oʻta qimmatga tushishi, oddiy qismlarga ajratish esa xodimlarni kelgusi F.04 tizimlarini loyihalashtirishdan chalgʻitib, haddan tashqari uzoq vaqt olishi taʼkidlandi. Toʻliq qayta eritish ixtisoslashtirilgan detallar va intellektual mulkni nusxalanishdan himoya qilish uchun tanlandi.

Kompaniya maʼlumotlariga koʻra, AQSH va Meksikadagi korxonalar, jumladan, mashinalarga oʻrnatilgan ishchi litiy-ionli akkumulyatorlar sababli utilizatsiyadan bosh tortgan. Natijada operatsiya Imatradagi zavodda sigʻimi 75 tonna boʻlgan elektr yoyi pechida amalga oshirildi. Rejalashtirishda «Afsonalarni fosh qiluvchilar» telekoʻrsatuvining sobiq boshlovchilari hamda ushbu gʻoyani avvalroq X ijtimoiy tarmogʻida taklif qilgan aktyor Arnold Shvarsenegger ishtirok etdi. Eʼlon qilingan kadrlarda aktyor birinchi robotni eritmaga tushiradi, shundan soʻng boshqa qurilmalar u yerga oʻzlari sakraydi.

Suratga olish ishlaridan oldin robotlar San-Xosedagi bosh qarorgohda kaskadyorlar va maxsus sunʼiy intellekt modeli yordamida harakatlanishga oʻrgatilgan, u yerda sakrashlar puflanadigan yostiqlarda mashq qilingan. Figure rolikni suratga olishda kompyuter grafikasidan foydalanilmaganini taʼkidladi. Yoʻq qilingan qurilmalarning aniq soni oshkor etilmayapti, biroq tashkilot F.02 parkining katta qismi tugatilganini bildirdi. Qolgan metall narxi 500 va 1900 dollar boʻlgan esdalik sovgʻalari tayyorlash uchun AQSHga olib ketildi.