Toyota butun dunyodagi zavodlarida 400 mingta robotni joriy qiladi

Nikkei Asia nashrining xabar berishicha, yangilik global ishlab chiqarishni modernizatsiya qilishning bir qismi boʻladi. Bevosita Toyota obyektlarida 150 mingta robotni jalb etish rejalashtirilmoqda, yana 250 mingtasi esa guruhning boshqa korxonalari zavodlariga joylashtiriladi.

2028-yildan boshlab kompaniya butun dunyo boʻylab ishlab chiqarish maydonlarini yangilash va qayta jihozlash uchun har yili 1 trln iyen (6 mlrd dollardan ortiq) mablagʻ yoʻnaltirish niyatida.

ELEY (Embodied Learning robot for Enhanced Yield) roboti taxminan 50 kg ogʻirlikka ega, gʻildirakli platformada harakatlanadi, akkumulyator yoki elektr tarmogʻidan ishlaydi hamda ikkita "barmoqli" ikkita qoʻl bilan jihozlangan. Qurilma detallarni ushlash va koʻchirish, mato bilan ishlash hamda tirik mutaxassislarning xatti-harakatlari asosida harakatlarni oʻrganishga qodir. Maʼlumot toʻplash uchun ishlab chiqarish liniyalaridagi ishchilar qurilma manipulyatorlarini aks ettiruvchi maxsus moslamalarni taqib oladilar.

Toyota ijrochi vitse-prezidenti Hiroki Nakajima avtomobil ishlab chiqaruvchisi robotlar korxonalardagi xodimlarning oʻrnini egallash emas, balki odamlar bilan hamkorlik qiladigan sharoitlarni yaratishga intilayotganini taʼkidladi.