Toshkentda 2027-yilga kelib maktab va bogʻchalarda 14 mingdan ortiq oʻrin yaratish taklif etildi

Loyihalarni Oʻzbekiston Respublikasining 2027-yilga moʻljallangan ijtimoiy va ishlab chiqarish infratuzilmasini rivojlantirish dasturiga kiritish rejalashtirilmoqda. Poytaxt maʼmuriyati maʼlumotlariga koʻra, takliflar tumanlardagi taʼlim muassasalarining yuklamasi tahlili natijalari asosida shahar hokimi oʻrinbosari Durdona Rahimova boshchiligidagi ishchi guruh tomonidan shakllantirilgan.

Maktab taʼlimi sohasida har biri 1980 nafar oʻquvchiga moʻljallangan ikkita yangi maktab qurish taklif qilinmoqda. Yana 8430 ta oʻrin Mirzo Ulugʻbek, Yashnobod, Sergeli, Yunusobod, Shayxontohur, Uchtepa, Olmazor va Yangihayot tumanlaridagi toʻqqizta faoliyat koʻrsatayotgan maktabni rekonstruksiya qilish va qoʻshimcha binolar barpo etish hisobiga olinishi belgilangan. Shuningdek, Chilonzor tumanidagi 178- va 90-sonli hamda Yakkasaroy tumanidagi 172-sonli maktablarni kapital taʼmirlash rejalashtirilgan.

Maktabgacha taʼlim sohasida Shayxontohur, Yashnobod va Olmazor tumanlaridagi toʻrtta muassasada 930 oʻrinli qoʻshimcha binolar qurish va rekonstruksiya qilish, shuningdek, Chilonzor va Mirzo Ulugʻbek tumanlaridagi toʻrtta bolalar bogʻchasini kapital taʼmirlash koʻzda tutilgan.

Avvalroq poytaxt hokimi Shavkat Umurzoqov «Gazeta.uz»ga bergan intervyusida shahar har yili kamida 15 ming oʻquvchi oʻrni yaratgan holda, sigʻimi kattaroq obyektlar qurish orqali taqchillikni yengish niyatida ekanini maʼlum qilgan edi. Uning soʻzlariga koʻra, 2026-yil boshida maktablar, bolalar bogʻchalari va sport muassasalarini rivojlantirish uchun 100 million dollarga yaqin mablagʻ zaxiraga olingan.