Toshkentda 2027-yil uchun maktab va bogʻchalarda 14 mingdan ortiq oʻrin yaratish taklif qilindi

Loyihalarni Oʻzbekiston Respublikasining 2027-yilga moʻljallangan ijtimoiy va ishlab chiqarish infratuzilmasini rivojlantirish dasturiga kiritish rejalashtirilgan. Poytaxt maʼmuriyati maʼlumotlariga koʻra, takliflar shahar hokimi oʻrinbosari Durdona Rahimova rahbarligidagi ishchi guruh tomonidan tumanlardagi taʼlim muassasalarining qamrovi tahlili natijalari asosida shakllantirilgan.

Maktab taʼlimi sohasida har biri 1980 nafar oʻquvchiga moʻljallangan ikkita yangi maktab qurish taklif etilmoqda. Yana 8430 ta oʻrin Mirzo Ulugʻbek, Yashnobod, Sergeli, Yunusobod, Shayxontohur, Uchtepa, Olmazor va Yangihayot tumanlaridagi faoliyat yuritayotgan toʻqqizta maktabni rekonstruksiya qilish hamda qoʻshimcha binolar barpo etish hisobiga olinishi belgilangan. Shuningdek, Chilonzor tumanidagi 178- va 90-sonli hamda Yakkasaroy tumanidagi 172-sonli maktablarni kapital taʼmirlash rejalashtirilgan.

Maktabgacha taʼlim sohasida Shayxontohur, Yashnobod va Olmazor tumanlaridagi toʻrtta muassasada 930 oʻrinli qoʻshimcha binolar qurish va rekonstruksiya qilish, shuningdek, Chilonzor va Mirzo Ulugʻbek tumanlaridagi toʻrtta bolalar bogʻchasini kapital taʼmirlash koʻzda tutilgan.

Avvalroq poytaxt hokimi Shavkat Umrzoqov “Gazeta.uz” nashriga bergan intervyusida shahar har yili kamida 15 mingta oʻquvchi oʻrni yaratgan holda, sigʻimi kattaroq obyektlar qurish orqali taqchillikni bartaraf etish niyatida ekanini maʼlum qilgan edi. Uning soʻzlariga koʻra, 2026-yil boshida maktablar, bogʻchalar va sport muassasalarini rivojlantirish uchun 100 mln dollarga yaqin mablagʻ zaxiraga olingan.