Oʻzbekiston maktablarida 577,7 ming nafar oʻqituvchi borligi maʼlum qilindi

2024/2025-oʻquv yiliga nisbatan maktab pedagoglari soni 12,8 ming kishiga yoki 2,3 foizga oshgan. Oʻqituvchilarning koʻpchiligini ayollar tashkil etadi — 72,5 foiz (418,8 ming kishi), erkaklar ulushiga esa 27,5 foiz (158,9 ming kishi) toʻgʻri keladi.

Eng koʻp pedagog Samarqand va Qashqadaryo viloyatlarida qayd etilgan — har bir hududda 65,1 ming nafardan mutaxassis bor. Fargʻona viloyatida 60,6 ming nafar, Surxondaryoda — 52,3 ming, Andijonda — 46,3 ming, Namanganda — 42,6 ming, Qoraqalpogʻiston Respublikasida — 40,7 ming, Toshkent viloyatida esa 40,2 ming nafar oʻqituvchi hisoblangan.

Xorazm viloyatida 35,1 ming nafar, Toshkent shahrida — 34,1 ming, Buxoro viloyatida — 33,4 ming, Jizzaxda — 25,7 ming, Navoiyda — 22,3 ming nafar pedagog ishlamoqda. Eng kam maktab oʻqituvchisi Sirdaryo viloyatida roʻyxatga olingan — 14,2 ming kishi.